تاند: ( شنبه ، د دلوې شپاړسمه) د طالبانو د حکومت د وياند مرستيال بلال کريمي وايي، چې دوی به کابل کې ژر له دیني عالمانو سره یوه مشورتي غونډه جوړه کړي.
نوموړي د یادې غونډې د ترسره کيدو دقیقه نیټه نه ده ښودلې.
طالب وياند زياته کړې، چې په دې غونډه کې به د حکومتولۍ د ښه کیدو په اړه له دیني عالمانو سره مشورې وشي.
معلومه نه ده، چې طالبان به په دې غونډه کې څومره دیني عالمان د کومو معيارونو په اساس مشورې ته را وغواړي.
پر طالبانو نیوکه ده، چې له خپلې ډلې د باندې دیني عالمانو سره هم توپیري چلند کوي او دیني عالمان یې هم په « طالب» او « غیر طالب» وېشلي.
په وروستيو کې د افغانستان له مختلفو ولايتونو څخه د جوماتونو له امامت څخه د یو شمېر مشهورو ديني عالمانو د ګوښه کیدو او پر ځای یې د طالبانو د اړوندو دیني عالمانو د ټاکل کیدو خبرونه ورکړل شول.
يو شمير ګوښه شویو دیني عالمانو د دغو ګومارنو په غبرګون کې د طالبانو جګړه د قدرت او امکاناتو د لاس ته راوړلو لپاره وګڼله او علماوو ته د توهین د بدو پایلو خبرداری یې ورکړ.