تاند:( پنج شنبه ، د قوس پینځه ویشتمه) راپورونه وايي، چې په ملګرو ملتونو کې د افغانستان له پرځول شوي جمهوري نظام څخه په دنده پاتې افغان استازي غلام محمد اسحاقزي له خپلې دندې استعفا کړې ده.
ځينو افغان دیپلوماتانو ویلي، چې هغه خپله استعفا د ملګرو ملتونو نړيوال سازمان ته وړاندې کړې ده.
د دغه استعفا دلیل د افغانستان د نظام نسکوریدل او کابل سره د غلام محمد اسحاقزي د اړیکې پرې کیدل ګڼل شوي.
خپله ښاغلي اسحاقزي يا د ملګرو ملتونو رسمي سرچينو تر اوسه دغه خبر نه دی تایید کړی.
په ملګرو ملتونو کې د افغانستان د استازيتوب په اړه د برخليک ټاکونکې کمېټې په ګډون د دغه نړيوال سازمان عمومي اسمبلۍ هم په ملګرو ملتونو کې د افغانستان څوکۍ د طالبانو د بيا – بيا غوښتنو او ورته د خپل استازي په توګه د سهيل شاهين له معرفۍ سره بيا هم یاد شوي نړيوال سازمان دغه استازيتوب طالبانو ته ورنه کړ.
دغه سازمان منلې وه، چې غلام محمد اسحاقزی به په دې سازمان کې د افغانستان د استازي په توګه خپلې دندې ته دوام ورکوي.