تاند:( پنج شنبه ، د قوس پینځه ویشتمه)‏‏‏‏ راپورونه وايي، چې طالبانو د دوی پر ضد د جمهوري نظام د ولسي جرګې د رييس او خپل خواخوږي میر رحمان رحماني کور او په پراخه کچه شتمنۍ ظبط کړي دي.

دا کار په اسپانيا کې د نړۍ د پارلماني مشرانو په غونډه کې د وينا پر مهال د رحماني له طالب ضدو څرګندونو وروسته شوی دی.

رحماني يادې غونډې ته د وینا پر مهال ويلي، چې که نړۍ په افغانستان کې د ټول ګډونه حکومت د جوړولو لپاره طالبان تر فشار لاندې ونه نيسي، دغه هېواد به د داعش او القاعدې ډلو په خوندي پناه ځای بدل شي.

اوس ځينو سرچينو ويلي، چې طالبانو د رحماني د دغو څرګندونو په غبرګون کې طالبانو د رحماني کور، شرکت، دفتر، وسایط، غ تېلو زېرمې، صنعتي پارکونه او نورې شتمنۍ مصادره کړي دي.

د دې ترڅنګ یې د هغه یو شمېر نیږدې کسان هم بندیان کړي دي.

په دې اړه دقیق او مفصل جزییات نه دي ترلاسه شوي.

میر رحمان رحماني د طالبانو له واکمنیدو څخه لا وړاندې یو ځل پاکستان ته په سفر لاړ او د منتقدینو لخوا ېې پاکستان او طالبانو سره په پټو معاملو او د هماغه معاملو په اساس د جمهوري نظام د تخريب په ښکاره هڅو تورن شو.

رحماني د کابل د سقوط په ورځ د جمهوري نظام له يوه ډله نورو ورته تخريبونکو سیاستوالو سره پاکستان ته پناه یوړه او ويل کېږي، چې هلته یې مخامخ د پاکستاني چارواکو په منځګړيتوب د طالبانو له مشرانو سره ځینې هوکړې وکړې.

د دغو هوکړو له مخې رحماني سلګونه طالب جنګياليو ته هره څو وخته پیک شوي خوراکي توکي برابرول او طالبانو یې په بدل کې د رحماني د شتمنيو ساتل او حفاظت منلي وو.

میړ رحمان رحماني، چې مخکې د امریکايي ځواکونو د تر ټولو لویې اډې ( بګرام) یو ستر قراردادي و، له پخوا نه طالبانو سره سخته دښمني لرله.

هغه د افغانستان له تر ټولو لویو میلیاردرانو څخه ګڼل کېږي، تر دې چې په میلیونونه امریکایي ډالرو د پارلمان د ریاست د څوکۍ په اخيستو هم تورن دی.

رحماني او طالبانو د دوی د نقض شوې معاملې راپورونو ته غبرګون نه دی ښودلی.

د طالبانو د امر بالمعروف او نهی عن المنکر وزارت وياند څو ورځې وړاندې وویل، چې طالبان خپلو مخالفانو ته د عمومي بښنې اعلان ته ژمن دي، خو هغه کسان به دغه اعلان نه مستثنی نه وي، چې د دوی مخالفت ته دوام ورکوي.