تاند:( یکشنبه ، د قوس يو ويشتمه)د پروان په بګرام ولسوالۍ کې نن ۵ طالبان وژل شوي او ۴ نور ټپيان دي.
ځايي چارواکي وايي، چې دغه پېښه د یوه رنجر موټر له چپه کېدو سره رامنځته شوې ده.
د پروان د امنيه قوماندانۍ د امنيت آمر اول ګل حق پرست وايي، چې په پېښه کې د دغه موټر پنځه تنه سپرلۍ وژل شوي او څلور نور ټپيان شوي دي.
د پېښې په اړه نور جزییات نه دي ورکړل شوي.
له موټر چلولو او د دندو د سيمو له اراضۍ سره د طالبانو د ځواکونو نابلدي د داسې پېښو عمده دلايل ګڼل کېږي.
د طالبانو ډېری جنګيالي، چې په مدرسو او جنګي سنګرونو کې روزل شوي، د موټر چلولو او امنيت ساتنې اړوند د نورو چارو سمه مسلکي روزنه يې نه ده ترلاسه کړې.