تاند ( یکشنبه، د اسد ۲۴) ولسمشر غني د کابل ښاریانو ته ډاډ ورکړ، چې د دوی امنیت به په پوره ډاډ سره وساتي.
هغه له لوړپوړو امنیتي مسوولانو سره په تیلیفوني خبرو کې دوی ته سپارښتنه وکړه، چې ملي اردو، امنیت ملي او پولیس دې د کابل ښاریانو د امنیت ساتنې مسوولیت په غاړه واخلي.
هغه په ټينګار سره وویل، هر هغه څوک چې د چور او تالان فکر او پلان لري سخت قانوني چلند ورسره ترسره کړئ.
ولسمشرغني سپارښتنه وکړه، چې امنیتي ادارې دې د شکایاتو شمېر ولسونو ته اعلان کړي څو د هغه کسانو مخنیوی وشي، چې د چور تالان پلان لري.
په ورته وخت کې د کورنيو چارو وزير عبدالستار ميرزکوال هم د کابل ښار د امنیت په تړاو خلکو ته ډاډ ورکوي.
میرزکوال وايي هېڅ چاته به اجازه ورنکړي چې عامه تاسيسات او د خلکو شتمنيو ته زيان ورسوي.
وسله والو طالبانو هم په یوه اعلامیه کې ویلي، چې وسله وال به يې د انتقال د پروسې تر بشپړېدو پورې کابل ښار ته نه ننوځي.
سرچینې ویلي، چې تر هغه وخته به د دې ښار امنیت مقابل لوري (افغان حکومت’ پرغاړه وي.
اعلاميه کې ويل شوي، د افغانستان د ټولو برخو د نيولو وروسته اوس د کابل ښار د نيولو اراده نه لري.
طالبان: د انتقال بهير تر بشپړېدو د کابل ښار د نيولو اراده نه لرو
طالبانو په دې اعلاميه کې په ټينګار سره ویلي چې ټول ملکي او نظامي کارکوونکو ته عمومي بخښنه کوي.