تاند ( یکشنبه، د اسد۲۴) العربیه تلویزیون د دیپلوماتیکو سرچینو په قول وايي، د افغانستان د کورنیو چارو د پخواني وزیر علي احمد جلالي په مشرۍ به عبوري حکومت جوړ شي.

له پرون راهیسې په ټولنیزو رسنیو کې د جلالي په مشرۍ د موقت حکومت اوازې خپرې دي.

خو نن العربیه تلویزیون وویل چې دیپلوماتیکو سرچینو ورته ویلي چې د افغانستان د کورنیو چارو پخوانی وزیر او په واشنګټن کې د دفاعي چارو پوهنتون استاد علي احمد جلالي د موقتې ادارې مشرۍ ته غوره شوی دی.

که څه هم تراوسه پورې نه دي ویل شوي چې د عبوري دورې موده به څومره وي خو په ټولنیزو رسنیو کې یو شمېر افغانان ادعا کوي چې جلالي به د شپږو میاشتو په مخه د عبوري حکومت مسوولیت په غاړه ولري.

خو  له بلې خوا پاکستان هڅه کوي چې د طالبانو او پخوانۍ شمال ټلوالې د مشرانو ترمنځ ګډ حکومت جوړ شي. پاکستان د محمد محقق، کریم خلیلي، میر رحمان رحماني، یونس قانوني او څو نورو مشرانو  لپاره د کابل نړیوال هوايي ډګر ته الوتکه راستولې چې اسلام اباد ته یې ورسوي او هلته یې له طالبانو سره موافقې ته ورسوي خو په هوايي ډګر کې دې الوتکې ته د پرواز اجازه نه ورکول کېږي.

په همدې حال کې د کابل له شماله ترلاسه شوي راپورونه وايي چې طالبانو نن بګرام هوايي اډه ونیوله.

په بګرام کې شاوخوا ۵۰۰۰ طالب بندیان هم ساتل کېږي.

په یوه بل خبر کې ویل شوي چې د پلچرخي محبس بندیان خوشي شوي او ورسره جوحت په ښار کې بې نظمۍ رامنځته شوې دي.

په پلچرخي زندان کې ډېر شمېر جنایتکاران هم سانل کېدل.

د محبس د شاوخوا سیمو اوسېدونکي وايي چې بندیانو له خلاصېدو سره سم له پولیسو وسلې په زوره اخیستي او د لوټ هڅه کوي.

د کابل ښار په ځینو نورو سیمو په تېره بیا د شمالي سرای په شاوخوا برخو کې د لوټ او غلاوو راپورونه ورکړای شوي دي.

د پروان د مرکز چاریکار له محبسه هم ټول بندیان په تېښته بریالي شوي دي.