تاند(پنج شنبه، د اسد ۱۴) امریکا وایي د نړۍ ۶۵ بېوزله هېوادونو ته یې ۱۱۰ ملیونه دوزه د کورونا واکسین ویشلي.
د امریکا ولسمشر جو بايډن په خپلو تازه څرګندونو کې ویلي دوی د ملګرو ملتونو د روغتیا نړیوال سازمان په لاس د نړۍ شاوخوا ۶۵ بېوزله هېوادونو ته ۱۱۰ میلیونه ډوزه واکسین ورکړی چې د ۲۰ هېوادونو د مجموعي مرستې په پرتله دا شمېره لوړه ده.
هغه زیاته کړې چې د جي اووه هېوادونو هم ژمنه کړې وه چې د نړۍ بېوزله هېوادونو ته به د کورونا ضد واکسین ورکوي خو یوازې امریکا تر اوسه دا ژمنه پوره کړې ده.
بایډن دغه راز وایي چې د روانې اونۍ په پای کې به هم ۱۰۰ هېوادونو ته د پنځه سووه ملیونه ډوزه واکسین وېش پیل کړي.
بایډن داسې مهال د واکسینو د وېش خبر ورکوي، چې اوس هم د نړۍ ګڼ بې وزله هېوادونه د کورونا ویروس له درېیمې څپې ځورېږي او مرستو ته ډېره اړتیا لري.