تاند ( دوشنبه، د اسد ۱۱) په کاناډا کې مېشتو افغانانو د سولې په ملاتړ او د پاکستان د وروستیو کړنو پر ضد لاریون ترسره کړ.
لاریون کوونکي، چې شمېر یې لسګونه ته رسېده له نړیوالې ټولنې وغوښتل، چې په افغانستان کې د پاکستان د نیابتي جګړې مخه ونیسي او دغه هېواد د افغانستان په چارو کې له لاسوهنې راوګرځوي.
دوی وایي طالبان په افغانستان کې پر جګړه ټینګار کوي او پاکستان د دغه جګړې ملاتړی دی چې باید پر وړاندې یې نړیوال بندیزونه وضع او فشارونه ورباندې ډېر شي.
دوی دغه راز د لاریون پرمهال له افغان ځواکونو ملاتړ وکړ او له افغان حکومت یې وغوښتل، چې د روانې جګړې د مدیریت لپاره دې هڅې ډېرې کړي.
د یادونې ده، چې تر دې وړاندې په امریکا، سویډن، برېټانیا، اتريش، فرانسه او نورو هېوادونو کې هم مېشتو افغانانو په افغانستان کې روانه جګړه د پاکستان نیابتي جګړه بللې ده او په لاریونونو کې یې له نړیوالې ټولنې غوښتي پر پاکستان فشارونه ډېر کړي.
اتریش او فرانسه کې مېشتو افغانانو د پاکستان پرضد لاریون ترسره کړ