تاند(چهارشنبه، د جوزا ۵) د کندهار هوايي ډګر نظامي اډې څخه د امریکايي ځواکونو تر وتلو وروسته د هغوي د تخنیکي وسایلو او مهماتو د پېر او پلور ګرم بازار دی.
د افغانستان په جنوب کې د بهرني ځواکونو دغه تر ټولو لویه پوځي اډه چې یومهال په کې شاوخوا ۳۰ زره بهرني عسکر دیره وه د روانې مي میاشتي په ۱۲ نیټه افغان ځواکونو ته وسپارل شوه.
په کندهار کې د بهرنيو ځواکونو تر وتلو وروسته د دغه ځواکونو د وسایلو او مهماتو پیر او پلور د یو شمیر خلکو لپاره د کار وسیله ګرځیدلې.
په اوونۍ کې له دوه تر درې ځله په وسایلو او مهماتو بار یو شمیر کانټنرونه له هوايي ډګر څخه راوځي او د کندهار ښار په ښوراندام سیمه کې د بوش په نوم په یوه بازار کې پلورل کیږي.
په کندهار کې د امیر محمد په نوم د دغه وسایلو یوه کاروباري رسنیو ته وویل چې په دغه وسایلو او نظامي مهماتو کې ویجاړ شوي زغروال ګاډي، جنراتورونه ، کانټرونه، خیمې ،کمپیوټرونه، مخابرې، انتونونه او د ځان ساتني ځانګړی وسایل شامل دي.
د حاجي کلات خان پهلوان په نوم یو بل کاروباري رسنیو ته وویل چې د بهرني ځواکونو د دغه مهماتو او وسایلو ډیره برخه د کباړ په بڼه پلورل کیږي.
تر دې مخکې امریکايي ځواکونو ویلي وو چې، دوی د راتلونکي خطر د مخنیوي لپاره هغه وسایل ویجاړوي چې نه غواړي د دښمن لاس ته ورشي.
له افغانستان د بهرنیو ځواکونو د وتلو بهیر د مي له لومړی نیټې پیل شوی او ټاکل شوې چې د سپټمبر د میاشتي تر ۱۱ نیټي بشپړ شي.
بلخوا لاس انجلس ټایمز وایي چې له افغانستان څخه د امریکایي ځواکونو تر وتلو وروسته د دغه هېواد د وضعیت د لا بدېدو ګواښ موجود دی.
راپور زیاته کړې، د امریکایي ځواکونو له وتلو سره سم طالبان په دې هڅه کې دي چې کندهار ولایت ونیسي.
د راپور له مخې، دغه ډله اوسمهال تر دغه ښار راتاو شوې او دغه ولایت یې تر خپلې کلابندۍ لاندې راوستی دی.
راپور کې دغه راز راغلي چې افغان حکومت هم د خلکو د تمې خلاف روان دی، ځکه خلک له دولت څخه امن، ازادي او ښه حکومتولي غواړي خو افغان دولت د بېلو ننګونو له امله د خلکو هیلې نه شي پوره کولی.
د ورځپانې په باور همدا لامل دی چې ورځ تر بلې یې د واک کړۍ را تنګېږي.