تاند (چهارشنبه د تلې ـ میزان ۳۰مه) د طالبانو ویاند، ذبیح الله مجاهد رسنیو سره خبرو کې ویلي، چې پاکستان سره د نښتو پر مهال ورسره ځینو امریکايي استازو اړیکې کړې وې.
هغه ویلي، چې دا تماسونه د اوربند او یا نښتو د درېدو په تړاو وې.
طالبانو که څه هم د دغو اړیکو د کچې په تړاو نور جزییات ورنه کړل، خو وايي پاکستان سره نښتې دومره اوږدې نه شوې، چې له سیمې هېوادونو پرته پکې لوی جهتونه منځګړیتوب وکړي.
د طالبانو ویاند پاکستان سره د اوربند برخه کې د منځګړو هېوادونو له رول هرکلی هم کړی دی.
امریکايي استازو د طالبانو د دغې ادعا په تړاو غبرګون نه دی ښودلای، خو ولسمشر ټرمپ ویلي وو، چې د «افغانستان» او «پاکستان» ترمنځ د نښتو په تړاو خبر دی.
په ورته مهال طالبانو سره د دوحې تړون لاسلیک کوونکي امریکايي ډيپلوماټ، زلمي خلیلزاد دا جګړه څارله او د شوي اوربند د هرکلي ترڅنګ یې یو ځل طالبانو سره د پاکستان په ښه نیت شک هم څرګند کړی و.
کابو تر یوې اوونۍ نښتو وروسته د طالبانو او پاکستان ترمنځ د قطر او ترکیې په منځګړیتوب دوحه کې هوکړه او اوربند وشو، چې تر اوسه یې د هوکړې لاسلیک شوی سند له خلکو پټ ساتل کېږي.