تاند ( پنج شنبه، د ثور ۲) افغان ولسمشر محمد اشرف غني نن کندهار ته له رسېدو وروسته په یاد ولایت کې د مهمند نړيوال ۲۰۰ بستريز روغتون پرانيست.
په دې سفر کې له ولسمشر سره نور لوړپوړي چارواکي هم ګډون لري.
ولسمشرغني د یاد روغتون د پرانیستې پرمهال وویل، د مهمند روغتون جوړېدل د کمال خان بند په څېر د ټولو افغانانو لپاره ملي ویاړ دی.
هغه وويل: « نن زموږ د روغتيا په تاريخ کې يو نوی فصل دی او د مهمند روغتون معياري خدمتونه او تجهيزات لري.»
ولسمشرغني د کابينې غړو ته لارښوونه وکړه، چې تر دې وروسته به ټول لوړپوړي دولتي مسوولين لومړی په مهمند روغتون کې درملنه
کوي او که اړتيا وه بهر ته به د درملنې لپاره ځي.
نوموړي مهمند روغتون د نوي کندهار انځور وباله او زیاته یې کړه چې د دغه روغتون د مسوولينو ټولو غوښتنو او وړانديزونو ته به رسيده ګي وکړي.
افغان ولسمشر دغه راز په خپلو خبرو کې طالبانو ته په اشارې وویل، د بهرنیو ځواکونو تر وتلو وروسته طالبان د جګړې د دوام لپاره دلایل نه لري.
هغه پر طالبانو غږ وکړ چې راشي په لوړ افغاني همت، یووالي، او درک دا وطن په ګډه جوړ کړي.