تاند(یکشنبه، د حوت ۱۰) د ملي امنیت صفر ۲ قطعه وایي، ځانګړو ځواکونو د ننګرهار ولایت په چپرهار ولسوالۍ کې د داعش ډلې د چاودنو مسؤل نیولی دی.
ملي امنیت زیاته کړې، تېره شپه امنیتي ځواکونو د ننګرهار په چپرهار ولسوالۍ، شولانې سیمه کې ځانګړي شپني عملیات ترسره کړي چې په ترڅ کې یې یو تن د داعش ډلې لپاره د جلال اباد ښار د چاودنو مسؤل نیولی دی.
سرچینه زیاتوي، د معلوماتو له مخې نیول شوي کس د پورته ذکر شوي دندې ترڅنګ د ټپي شویو داعش وسله والو انتقال، ماین جوړولو او لیږدولو په برخه کې هم فعالیت کاوه.
د یادونې دی چې تردې وړاندې هم په ننګرهار ولایت کې د داعش ډلې پر وړاندې زیات عملیات ترسره شوي او ډېری غړي یې نیول شوي او وژل شوي دي.
څو ورځې وړاندې هم د ملي امنیت ځانګړو ځواکونو په ننګرهار ولایت کې د داعش ډلې د جلب او جذب عمومي مسوول نیولی وو.
ننګرهار د افغانستان یو له هغه ولایتونو څخه دی چې داعش ډله په لومړیو کې په کې پیدا شوه او په دغه ولایت کې یې ډېری خلک ووژل د خلکو مالونه یې لوټ کړل او ننګرهار یې له سختو ناامنیو سره لاس او ګرېوان کړ.