تاند ( سې شنبه، د دلوې ۱۴) د هاليووډ فلمونو نوموتې ٥٣ کلنې اداکارې پاميلا انډرسن د خپلې خوښې پنځم طلاق وروسته شپږم واده د خپل ساتونکي سره وکړ.
د مېل انلاين د راپور له مخې، اداکارې انډرسن د ٢٠٢٠کال د جنورۍ په شلمه پنځم واده د خپل ملګري ٧٤ کلن جان پيټرز سره کړی وو،چې يوازې ١٢ ورځې وروسته ترې انډرسن طلاق واخيست
د مېل انلاين راپور دغه راز زياتوي، د پنځم واده د ناکامۍ وروسته اداکارې انډرسن شپږم واده د خپل ګارډ يا ساتونکي ډين هرست نومې کس سره وکړ.
راپور کاږي، د هغې اوسنی خاوند په کاناډا کې د نوموړې د پلارني کلي اوسېدونکی دی.
اداکارې انډرسن ويلي چې هغه سره يې د کرونا وبا ګرځبنديز پر مهال مينه پيدا شوه، او بالاخره دواړو د يو کوچني پروګرام په نيولو سره واده وکړ.
د مېل انلاين راپور زياتوي، اداکاري انډرسن خپل ساتونکي سره د شپږم واده کولو وروسته وويل” اوس مې خپله اصلي مينه پېداکړه او يو داسې کس مې د ژوند ملګری شو چې ما سره ريښتنې مينه کوي.”