تاند ( سې شنبه د دلوې، ۱۴) د ټولنيزو رسنيو تر ټولو مشهورې وېبپاڼې فېسبوک د ٢٠٢٠ کال د وروستيو ٣ مياشتو معلومات خپاره کړي دي، چې څومره خلکو فېسبوک کارولى او همدا راز فېسبوک څومره پېسې ګټلي دي
د فېسبوک کمپني وايي، د ٢٠٢٠ کال په وروستيو درې مياشتو کې د دوى عايد ٢٨ ميليارده امريکايي ډالرو ته رسېدلى، چې د تېر کال په پرتله یې ٣٣ سلنه عایدات زيات شوي دى.
دغه کمپني همدا راز زیاتوي چې یاده موده کې یې څه باندې ١١ ميليارده ډالر ګټه کړی او دا د تېر کال په پرتله ٥٣ سلنه زياتوالی ښيي.
د فېسبوک معلومات وايي، چې که څه هم تېر کال ډېرې شخړې او نړيواله وبا راغله، خو بيا هم فېسبوک په دې کې بريالى شو، چې په وروستيو درې مياشتو کې د ډېرو خلکو پام جلب کړي.
د فېسبوک په وېنا، د تېر کال په وروستيو درې مياشتو کې هره ورځ ١.٨٤ ميليارده کسانو فېسبوک کاراوه، خو په مياشت کې بيا ٢.٨ ميليارده هغه کسان وو چې فقط به یې فیسبوک ته د څو شېبو لپاره سر ور ښکاره کاوه.
د فیسبوک د معلوماتو له مخې، د فېسبوک نور اپليکېشنونو انسټاګرام، وټساپ او مسينجر هم د تېر کال په وروستيو درې مياشتو کې ډېر پرمختګ کړى او د مياشتې کاروونکي يې ٣.٣٠ ميلياردو ته رسېدلي وو.
فیسبوک کمپنۍ د خپلو کاروونکو ډېروالی د کرونا وبا له کبله د خلکو بې کاري او قرنطین په ګوته کړی دی.