تاند(دوشنبه، د جدي ۲۹) د انډيا ټایمز ورځپاڼې د راپور له مخې، د هندوستان حکومت اعلان کړی چې ډېر ژر به د افغانستان په ګډون خپلو ګاونډیو هېوادونو ته د کورونا ضد واکسین ولېږي.
د انډیا ټایمز ورځپاڼه وایي، د هندستان حکومت اعلان کړی چې په نږدې راتلونکي کې به خپلو ټولو ګاونډیو هېوادونو ته د کورونا ضد واکسین ورکړي.
دغه ورځپاڼه وایي، د کورونا ضد واکسین به نیپال، بوتان، بنګلدیش، میانمار، سریلانکا، افغانستان، مالدیف او ماریشوز ته ولېږي.
دا په داسې حال کې ده چې د انګلستان او امریکا ترڅنګ هند هم د کورونا ضد واکسین جوړ کړی او په اوس وخت کې په هندوستان کې د پلي کېدو په حال کې دي.
انډیا ټایمز وایي، د واکسین د اعلان سره سم په لومړۍ ورځ په هندوستان کې ۱،۹ لکه کسانو ته دغه “واکسین ورسېد.
هندوستان دغه واکسین د تېرې شنبې په ورځ په هند کې پیل کړل چې تراوسه هم هلته دوام لري، انډیا ټایمز وایي، تراوسه ډېریو هېوادونو سیروم انسټیټیوټ ته چا چې دغه واکسین جوړ کړی و غوښتنه ترې کړې چې دوی ته دې واکسین ولېږي.
کورونا ویروس چې تېر کال راپیدا شو د نړۍ ګڼ هیوادونه یې زیانمن کړل او په زرګونو خلک یې ووژل.