تاند ( دوشنبه، د جدي ۲۹) د ننګرهار ولایت چارواکي د دې ولایت په حصارک ولسوالۍ کې لسګونه طالبانو ته د مرګ ژوبلې ادعا کوي.
د دې ولایت د رسنیو دفتر په یوه خبرپاڼه کې وایي، د دې ولایت په حصارک ولسوالۍ کې د افغان ځواکونو په عملیاتو کې د یوه قومندان په ګډون ۳۱ طالبان وژل شوي او ۲۸ نور ټپيان شوي دي.
خبرپاڼه زیاتوي چې دا عملیات په تېرو ۴۸ ساعتونو کې د حصارک ولسوالۍ په بېلابېلو سیمو کې ترسره شوي دي.
د خبرپآڼې په حواله په دې عملیاتو کې د طالبانو ګڼ شمېر وسلې هم له منځه وړل شوي دي.
سرچینه وایي په دې عملیاتوکې ملکي وګړو ته کوم زیان ندی اوښتی .
بل لورته د ملي دفاع وزارت په یوه خبرپاڼه کې وایي چې تېره ورځ د کندهار په ژېړۍ او ارغنداب ولسوالیو کې افغان ځواکونو د عملیاتو پرمهال ۲۵ طالبان وژلي او ۸ نور يې ټپيان کړي دي.
دفاع وزارت زیاتوي په دې عملیاتو کې د طالبانو دوه پټنځایونه هم له منځه وړل شوي.
بل لورته وسله والو طالبانو بیا د یادو دواړو پېښو په اړه رسنیو ته څه نه دي ویلي.