تاند (پنجشنبه د عقرب ۲۹) د افغانستان د بشر حقونو خپلواک کمیسیون وايي، د اسټراليايي ځواکونو له خوا د افغان ملکي وګړو د بې رحمانه وژلو په اړه د عمومي پلټونکي څيړنيز رپوټ ښيي چې د دې هېواد سرتېرو افغانستان کې ملکي وګړو سره غیر انساني چلند کړی دی.

دغه کمېسیون په یوه خبرپانه کې ویلي، اسټراليايي ځواکونو په افغانستان کې د خپل حضور پر مهال ۳۹ ملکي افغانان په قصدي توګه وژلي او له ۲ تنو سره يې تاوتريخوالی کړی دی.

په خبرپاڼه کې زیاته شوې په دې برخه کې د جنايتونو ۲۵ عاملين په ګوته شوي دي.

د بشر حقونو کمېسیون وايي دا پېښې په ښکاره د نړیوالو بشرپالو حقونو او د وسله والو شخړو د قانون نقض او جنګي جنايت دی.

دغه کمیسیون د اسټرالیا له حکومت څخه غوښتي چې یاد سرتېري تر قضایي تعقیب لاندې ونیسي او د حقيقت موندنې او عدالت لپاره د افغان قربانيانو غوښتنو ته غوږ کیږدي.

د استرالیايي پوځیانو د جنګي جنایتونو په اړه په تحقیقاتو کې څرګنده شوې چې د دغه هیواد ځانګړي ځواک په افغانستان کې په غیرقانوني ډول ۳۹ ملکي افغانان او جنګي اسیران وژلي دي.

د دوی دوسیه، چې په اړه یې څو کاله تحقیق وشو او د پنجشنبې په ورځ خپره شوه، اوس د جنګي جنایتونو ځانګړي څارنوال ته وسپارل شوه.

https://taand.net/%d8%af-%db%b3%db%b9-%d8%a7%d9%81%d8%ba%d8%a7%d9%86%d8%a7%d9%86%d9%88-%d9%be%d8%b1-%d9%88%da%98%d9%84%d9%88-%d8%a7%d8%b3%d8%aa%d8%b1%d8%a7%d9%84%db%8c%d8%a7%d9%8a%d9%8a-%da%86%d8%a7%d8%b1%d9%88%d8%a7/