تاند (پنجشنبه د عقرب ۲۹) په سعودي عربستان کې د لومړي ځل لپاره د ښځینه وو د فوټبال غوره لیګ سیالۍ پيل شوې.
دا سیالۍ چې د څو میاشتو له راپدېخوا د کورونا له امله ځنډېدلې وې د تیرې سه شنبې په ورځ په ریاض کې پيل شوي.
په دې لیګ کې ۲۴ ټیمونو او تر ۶۰۰ زیاتو لوبغاړو برخه اخیستې چې د اتلولۍ جام او ۱۳۳ زرو امریکايي ډالرو ترلاسه کولو لپاره سیالۍ کوي.
ددغه لیګ تر څنګ په سعودي عربستان کې په روانه اونۍ کې د ګلف د ښځینه لوبو نړیوال ټورنمنټ هم پیل شوی دی.
سعودي عربستان په دې وروستیو کې د ښځو ازادۍ لپاره ګامونه پورته کړي چې په ژوندۍ بڼه په لوبغالو کې د لوبو لیدل، موټر چلول، له نکاح پرته له نارینه وو سره سفر کول هغه ازادۍ دي چې د عربستان میرمنې ترې نږدې کلونو کې برخمنې شوي دي.