تاند(چهارشنبه، د عقرب۲۱) د کډوالو لپاره د ملګروملتو لویې کمیشنرۍ په پاکستان کې د افغان کډوالو له څه باندې ۵۰ زره کورنیو سره، چې له کورونا وبا اغېزمن شوې وې، بیړنۍ مرستې وکړې.
د ملګروملتو د کډوالو لویې کمیشنرۍ یا یو این ایچ سي آر د سې شنبې په ورځ وویل، غواړي چې په پاکستان کې له کورونا وایرسه له ۷۰ زره اغېزمن شویو افغان مهاجرو کورنیو سره مالي مرسته وکړي او تراوسه پورې یې د هغو له منځه له ۵۰ زره کورنیو سره مالي مرسته کړې ده.
د احساس پروګرام په نوم د دې مرستې پر اساس هرې کورنۍ ته ۱۲ زره روپۍ ورکول کېږي چې هغه تاوان یې څه نا څه جبران شي چې د کورونا وبا له کبله وراوښتی دی.
د کډوالو د لویې کمیشنرۍ د اسیا- پسفیک د سیمې ريیسه اندریکا راتواتې پرون (سې شنبه) پاکستان ته په درې ورځني سفر ورسېده. دې ۵۰ زره افغان کورنیو ته د مرستو په ورکولو خوښي ښکاره کړه او هیله یې څرګنده کړه چې ټولو ۷۰ زره کورنیو ته مرستې ورسېږي.
د ملګرو ملتونو د کډوالو ادارې د معلوماتو له مخې اوسمهال ۱.۴ ملیونه افغان کډوال په پاکستان کې اوسي.