تاند (چهارشنبه، دعقرب ۲۱) امریکا وایي راتلونکی حکومت به هم د ټرمپ په څېر پر ایران خپلو بندیزونو ته ادامه ورکوي.
د ایران په اړه د امریکا د بهرنیو چارو وزارت ځانګړي استازي الیوت ابرامز ویلي، ایران په سیمه کې د ترهګرۍ ملاتړی دی او دا د ټرمپ نظر نه بلکې ټول امریکايي حکومت په دې باوري دی.
د الیوت ابرامز په خبره د حکومت په بدلېدو سره به په امریکا کې د ایران په اړه دریځ بدل نه شي.
بل لورته بيا د ایران د بهرنیو چارو وزیر جواد ظریف په امریکا کې د نوو تحولاتو په اړه ویلي، د امریکا او ایران ترمنځ راتلونکی وضعیت د امریکایي حکومت په چلند پورې تړاو لري.
امریکایي چارواکي داسې مهال دغه څرګندونه کوي چې د امریکا خزانې وزارت پر ایران تازه نور بندیزونه هم وضع کړي دي.