تاند(دوشنبه، د میزان ۲۱) امریکایي سناتور وایي ټرمپ له افغانستان د خپلو سرتېرو د ایستلو په برخه کې جدي دی.
سناتور راند پال وايي چې تازه یې له ولسمشر ټرمپ سره د افغانستان د وضعیت پر سر خبرې کړې دي.
د هغه په وینا ټرمپ ژمنه کړې چې ژر تر ژره به له افغانستان خپل سرتېري وباسي.
د نوموړي په خبره ټرمپ د سرتېرو د ایستلو په برخه کې جدي دی او هغه په تمامه مانا غواړي د امریکا ناپایه جګړې پای ته ورسوي.
ټرمپ څو ورځې وړاندې په ټوېټ پیغامونو کې ویلي وو چې ژر به له افغانستان خپل ټول سرتېري وباسي هغه د خپلو ټولو سرتېرو د ایستلو لپاره دوه میاشتې وخت ورکړی دی.
دې مسئلې په امریکایي حکومت کې ګڼ غبرګونونه لرلي دي او ډېر امریکایان یې کمپایني څرګندونې بولي.