تاند(جمعه، د سنبلې ۲۸) د ملي پخلاینې عالي شورا مشر عبدالله عبدالله وايي د افغانستان د اسلامي جمهوریت او طالبانو ترمنځ خبرې به پېچلې وي او د افغان حکومت مرکچي ډله به له داسې مسئلو سره مخ شي چې سختو پرېکړو ته به اړتیا ولري.
خو عبدالله ژمنه وکړه چې د خبرو اترو په لړ کې به د ښځو د حقونو او مدني ازادیو په ګډون د افغانستان د خلکو حقونه خوندي شي.
عبدالله وايي:
زه نه وایم چې دا خبرې به خورا ساده وي، دا خبرې به ډیرې سختې وي. موږ به له داسې مسئلو سره مخ شو چې سختو پریکړو ته به اړتیا ولري، خو د افغانستان د اسلامي جمهوریت پلاوی د افغان حکومت او افغان سیاستوالو په ملاتړ قطر ته تللی دی.
له بل لوري د افغانستان د بهرنيو چارو وزير محمد حنيف اتمر وايي، کابل اوربند ته رسېدل د بينالافغاني خبرو پيل کې مهم ګام ګڼي.
خو تر دې مهاله طالبان چمتو نه دي چې اوربند ومني، د دغه ډلې وياند ډاکټر نعيم ويلي، تر هغې چې په افغانستان کې د جګړې عوامل له منځه نه وي تللي، جګړه به دوام کوي.
د افغان حکومت او طالبانو تر منځ د سولې خبرې د روانې اوونۍ د شنبه په ورځ پيل شوې او تر دې مهاله هم دواړه لوري نه دي توانېدلي چې د دې خبرو لپاره طرزالعمل بشپړ کړي.