تاند ( چهارشنبه، د سنبلې ۲۶) د لغمان ولایت په الیشنګ ولسوالۍ کې نن سهار په یوه ترافيکي پېښه کې ۱۱ تنو ته مرګ ژوبله اوښتې ده.
د لغمان د والي ویاند اسدالله دولت زي تاند ته وویل، چې پېښه د اليشنګ ولسوالۍ ګونه پال سيمه کې شوې او په خبره یې په دې پېښه کې ۱ تن مړ شوی او ۱۰ تنه نور ژوبل شوي دي.
دولت زی وايي، موټر په یاده سيمه کې له یوې لوړې سطحې کندې ته لوېدلی دی.
د نوموړي په خبره ټپيان د مرکز مهترلام روغتون ته لېږدول شوي او تر درمنلې لاندې دي او زیاتوي، چې د ټپيانو حالت ښه ښودل شوی دی.
خو بل لورته ځایي خلک بيا وایي، چې داليشنګ ولسوالۍ ډیری لارې له خطرونو ډکې دي او بايد ورغول شي.
د دوی په خبره له یوه اړخه په جګړو کې وژل کېږي او بل لورته بیا د لارو د خرابوالي له امله ترافيکي پېښو هم انديښمن کړي دي.