تاند ( چهارشنبه، د سنبلې ۲۶) افغان ولسمشرمحمداشرف غني تېر ماښام د کرکټ بورډ له مسولانو د کرکټ د ملي ټيم له غړو او د شپږېزې کرکټ لیګ اووم پړاو سیالیو لوبغاړو سره په سلام خانې ماڼۍ کې وکتل.
په دې ناسته کې د ولسمشر لومړي مرستیال او یو شمېر لوړ پوړو دولتي چارواکو هم ګډون درلود.
د دې ناستې پرمهال د کرکټ بورډ عمومي مشر فرهان الله یوسفزي د کرکټ لوبغاړو ته په ټینګار سره وویل، چې د ورزش قوانینو ته درناوی ولري او پام ورته وکړي.
هغه زياته کړه:« ورزشکاران، د هېوادو ویاړ دي او تل یې ملي بيرغ په نړۍ کې ځلانده ساتلی دی»
په ورته مهال ولسمشرغني وویل ویاړي، چې په سلام خانې ماڼۍ کې د کرکټ له لوبغاړو سره ويني.
ولسمشر زیاته کړه، چې د کرکټ ملي ټیم د نړۍ په هر ډګر کې د هېواد نوم روښانه کړی او په خبره یې د ورزش د ډګر هره څېره هيله بښونکې ده.
د ناستې په پای کې د کرکټ بورډ مسولانو هغه بېټ، چې د لوبغاړو لاسليکونه پرې شوي وو ولسمشرغ غني ته ډالي کړ.
ولسمشر داسې مهال د کرکټ بورډ له مسولانو او لوبغاړو سره ویني، چې هم مهاله د کرکټ د شپږيزه ليګ اووم پړاو سیالۍ تر پای لوبې رسېدلي دي.
د دې سیاليو پای لوبه کې د کابل بازانو او مس عینک لوبډلې نن له غرمې وروسته سیالي کوي.