تاند- مرسدیس بینز کمپنۍ داسې موټر جوړوي چې هم په هایدروجن او هم بېټرۍ کار وکړي.
د بینز کمپنۍ به د جرمني د فرانکفورت په نندارتون کې دا موټر نندارې ته کښېږدي.
تراوسه پورې د دغه موټر د تخنیکي چارو او تکنالوژۍ په اړه ډېر څه نه دي ویل شوي او د بنز کمپنۍ وايي چې وروسته به په دې اړه معلومات خپاره کړي.
بینز کمپنۍ، چې مرکز یې د جرمني په شتوتګارت ښار کې دی، وايي چې په دغه موټر کې یې د هایدروجن د سوځېدو لپاره یوه خاصه طریقه کارولې ده چې تر دې وړاندې ورڅخه کار نه و اخیستل شوی.
د دې موټر بېټرۍ د ښارونو د لنډ سفر لپاره ده خو له هایدروجن څخه په اوږدو سفرونو کې کار اخیستل کېږي.
د بنز کمپنۍ اوس پر دې موټر ایروډاینامیک ازمېښتونه کوي.
دا کمپنۍ وايي چې په هسپانیا، سویډن او جرمني کې یې دا موټر د سانتي ګراد په منفي ۴۰ او مثبت ۶۰ درجې او دغه راز په باران او واورو کې تجربه کړی دی.