ټک ټک شو. ښځې د غوږ شاته لاس ونیو. میړه ورته وویل:
-یو خو ستا له موږکه زړه چوي، پیشو له وره سره ده
-ګناه لري دباندې ډیر یخ دی لاره ورکړه
سړي د خپل زوی لستوڼی بډواهه:
-ته ورته ګوره تک سور شوی
– خو هلک یې په کراره نه پریږدي له لکۍ یې راکشوي اخر هغې هم نوکراغې کړ
سړي سګریټ ولګاوه. میرمنې یې ورته وویل:
-پیشو پسې ورکه نه شي
-دغه دې لوری شي
-دا زوړ کور خو به مو موږک په سر سره واخلي
سړی سګریټ د کړکۍ خواته پف کړ. پیشو د کړکۍ پر ژۍ د بهر خواته غونجه منجه ناسته وه، میو یې وکړ. سړی هاهاها وخندل:
-اوس یې عذر ته ګوره
ښځې کمپله پر ماشوم سمه کړه او کړکۍ ته ورغله. د پیشو بریتونه په واورو سپین شوي و، لکۍ یې ترځان لاندې کړې وه. ښځې د کړکۍ لاستې ته لاس وروغځاوه. سړی یې لاس پورې واهه. پیشو له ډاره شاته ټوپ کړل.
په کوټه کې بیا ټک ټک شو. ښځې وئ کړل:
-په خدای موږک دی مخکې دې ویل چې پیشو په وره کې ده هله پیشو ته ور ورخلاص کړه
سړي د پخلنځي ور ورو پرانیست. په المارۍ کې ټکا وه. د وره له غږ سره غلې شوه. ده د المارۍ پله راکش کړه، بله المارۍ یې خلاصه کړه، چې دریمه یې پرانیسته، خرهاری شو پیشو پرې ځان وموښه. دی راپه شا شو. ښځې ته یې بد بد وکتل. پیشو د المارۍ مخې ته پښې وغځولې، بریتونه یې څک کړل .
سړي په راایستلو سترګو ښځې ته وویل:
-ډوډۍ ورنه کړې مه کوه چې همدا وخوري.
پای