تاند (دوشنبه، د سرطان ۳۰) د ملي دفاع وزرات خبر ورکوي چې د طالبانو د بریدونو پلان جوړونکی یې نیولی.
د ملي دفاع وزارت وايي امنیتي ځواکونو یې د کابل د قره باغ ولسوالۍ لپاره د طالبانو د بریدونو پلان جوړونکی نیولی دی.
د ملي دفاع وزارت مرستیال ویاند فواد امان وايي چې د طالبانو دغه لوړ رتبه غړی یې تېره شپه د قره باغ ولسوالۍ په مربوطاتو کې د امنیتي ځواکونو له خوا نیول شوی دی.
امان وايي د طالبانو دغه نیول شوی کس بریالی نومېږي.
نوموړي زیاته کړې چې بریالی په قره باغ ولسوالۍ کې د طالبانو د «تروریستي او تخریبي» کړنو مسؤل دی.
فواد امان دغه راز وايي د «۱۱۱» فرقې امنیتي ځواکونو بریالی د باغ علم په مربوطاتو کې نیولی دی.
د هغه په وینا، بریالی د قره باغ ولسوالۍ لپاره د طالبانو د نومول شوي ولسوال جمیل ورور و.
طالبانو تر اوسه په دې تړاو څه نه دي ویلي.