تاند(دوشنبه، د سرطان ۳۰) د افغان ښځو پر وړاندې د تاوتریخوالي په اړه د ښځو چارو وزارت، لوی څارنوالۍ او د بشري حقونو خپلواک کمیسیون نن سهار یوه ګډه خبري ناسته ترسره کړه.
یاده خبري ناسته د روان کال په لومړیو شپږو میاشتو کې د ښځو پر وړاندې د تاوتر یخوالي په اړه د حکومت په رسنیو مرکز کې جوړه شوې وه.
د ګډون کوونکو ادارو لخوا د ورکړل شويو معلوماتو له مخې ، په هيواد کې د ښځو پروړاندې د تاوتريخوالي ثبت، کمښت او د زياتوالی څرنګوالی بيلابيلې شميرې ښودل شوې، خو هغه څه چې ارقام ښيي د روان کال په لومړيو شپږو مياشتو کې د ښځو په وړاندې دتاوتريخوالي کمښت دی.
د ښځو چارو وزارت د پالیسۍ او مسلکي چارو مرستیالې سپوږمۍ وردګ، د سږکال په لومړیو شپږو میاشتو کې د تاوتریخوالي کمیدو اصلي لامل قرنطین، د خدماتي ادارتو کاري رژیم او د قضایاوو په حل کې د برخه اخیستونکو اداراتو بریالی فعالیت بیانوي.
بل پلو لویه څارنوالي او د بشري حقونو خپلواک کمیسیون وایي د تاوتریخوالي د منعې څارنوالۍ رامنځته کول، خصوصي بنسټونه او ښځو ته د هغوې حقونو په اړه پوهاوی ورکول په دې برخه کې موثر ثابت شوي او تاوتریخوالی کم شوی.
په ځینو مواردو کې په ځینو ولایتونو کې د تاوتریخوالي د زیاتوالي اقتصادي کمزورتیا، د دندو نشتون، فقر او د دولت د حاکمیت ضعف او د زورواکو مداخله هم بلل شوې ده.
یادو بنسټونو د ښځو پروړاندې د تاوتریخوالي د ډیریدو په اړه، هغه چې د وژنې، ځان سوځونې، اعدام او نورو قضایاو لامل شوی وي خواشینې څرګنده کړه.
دا خبرې داسې مهال کیږي چې ویل کیږي د افغان ښځو پر وړاندې له عامه پوهاوي سره سره اوس هم د تاوتریخوالي ګڼ ګواښونه موجود دي.