تاند (دوشنبه، د سرطان، ۳۰) طالبانو د موټر چلوونکو هغه ادعاوې چې ګوندې دوی ترې پیسې اخلي منلې دي.
طالبانو منلي چې په خپلو نفوذي سیمو کې له تېرېدونکو موټرونو پیسې اخلي.
د طالبانو ویاند ذبیح الله مجاهد وايي د هغو موټرونو چې ددوی تر واک لاندې سیمو کې تګ راتګ کوي د امنیت د تامین په بدل کې ترې یوه اندازه پیسې اخیستل کېږي.
مجاهد وروسته تر هغه دغه څرګندونې کړي چې له څو ورځو راهیسې د شمال-کابل پر لویه لاره موټر چلوونکي شکایت کوي چې وسله وال طالبان ترې پیسې اخلي او موټرونه یې د لارې په اوږدو کې درول کېږي.
په ورته مهال د بغلان سیمه ییز چارواکي مني چې طالبان وخت ناوخت د کابل-بغلان په لویه لاره له موټرچلوونکو پیسې اخلي او عام خلک زوروي.
چارواکي زیاتوي چې یوه اونۍ وړاندې طالبانو د چشمه شېر په سیمه کې له موټرونو پیسې اخیستې خو دوی یې په وړاندې عملیات تر سره کړل او طالبان یې په شاه کړل.
د چارواکو په خبره دغه ستونزه اوس حل شوې ده.