تاند( دوشنبه، د سرطان ۳۰) په ختیځو ولایتونو کې نن د ګوزڼ ضد واکسین کمپاین پيل شو.
ختیځ کې د پولیو واکسینو د کمپاین مسولان وایي، چې دغه کمپاین له تېرو سره په توپير پيلیږي او په خبره یې لامل یې دا دی، چې په دې کې د کورونا د پراختیا د مخنیوي لپاره واکسین کوونکو ته ځانګړې روزنه هم ورکړل شوې ده.
مسولان زیاتوي، چې دغه کمپاین به په راتلونکو دوو میاشتو کې د هېواد په څوارلسو ولایتونو کې دوام کوي.
د دوی په خبره دا هغه ولایتونه دي، چې ډیورنډ فرضي کرښې ته نږدې پراته دي.
ختیځو ولایتونو کې د پولیو واکسین کمپاین داسې مهال پيلیږي، چې روان کال تر دې دمه د پولیو ۱۹ مثبتې پېښې ثبت شوې دي.
د یادولو ده، چې افغانستان یو له هغوهېوادونو دی، چې تر دې دمه پکې پولیو ویروس په بشپړه توګه نه دی ورک شوی.