تاند( دوشنبه، د سرطان ۳۰) متحده عربي اماراتو د هیلې په نوم خپله بیړۍ مریخ ته ولیږله.
چارواکي وایي دا بېړۍ یې د جاپان له تانګاشیما ټاپو وتوغوله او زیاته یې کړه، چې۵۰۰ میلیونه کیلومتره به سفرکوي.
د متحده اماراتو دا بیړۍ تیره اونۍ د خرابې هوا له امله دوه ځلې وځنډول شوه او له همدې امله سفر نه پاتې شوه.
د یاد پروګرام مشرې سارة الأمیري هیله ښودلې، چې مریخ ته به د دې پلټونکي بېړۍ د توغولو اغېز پر ولس هومره وي څومره، چې دوی هیله لري.
سایسنپوهان وایي که دا پلټونکې بېړۍ خپلې موخې ته ورسېږي، نو یو مریخي کال کې به- چې له ۶۸۷ ورځو سره برابر دی- پر دې سیاري وګرځي او مالومات به یې ځمکې ته واستوي.
اماراتي انجینرانو تېرو شپږو کلونو کې د دې د هیلې بېړۍ د ډیزاین، جوړولو او توغولو لپاره د امریکا له پوهنتونونو مرسته ترلاسه کړه.
ویل کیږي، چې دا بېړۍ به د مریخ د اتموسفیر په هکله پلټنې کوي او د دې سیارې د اب و هوا د ډېرې برخې د له منځه تلو لامل به ارزوي.