خبریاله: عاقله اسد(یکشنبه، د سرطان ۲۲) د افغانستان د ولسي جرګې لومړی نایب وايي چې د نوي حکومت د وزیرانو لپاره د نوماندانو د باور رایه به په خپل وخت ترسره شي.
میرزا محمد کټوازي وايي، د کورونا وایرس د دې خنډ کېدای نه شي چې د ولسي جرګې غړي نوماندوزیرانو ته د اعتمادرایې ورنه کړي.
د ولسي جرګې لومړي مرستیال ښاغلي کټوازي پرون شنبه رسنیو ته وویل چې که حکومت وزیران معرفي کړي، ولسي جرګه به د باور رایې ورکولو لپاره د جرګې غړي راوغواړي.
میرزا محمد کټوازي زیاته کړه: “د کورونا مسله په هیڅ ډول د کابینې لپاره د رایې ورکولو ځنډ نه توجیه کوي.
ده وویل، له حکومت څخه یې غوښتنه دا ده چې ژر تر ژره کابینه معرفي کړي چې د نظارت مسله حل شي.
دا څرګندونې په داسې حال کې کیږي چې د افغانستان حکومت تیره اوونۍ وویل چې ډیر ژر به نوي وزیران ولسي جرګې ته د باور رایو لپاره معرفي کړي.
د ولسي جرګې یو شمېر غړي وايي، سرپرستي باید ختمه شي، او ژر تر ژره باید کابینه معرفي شي.
خو د دې جرګې مرستیال ښاغلی ګټوازی وايي، د دوی رخصتۍ ته لس ورځې پاتې دی، خو شاید کابینه له رخصتۍ وروسته معرفي شي.
دا په داسې حال کې ده چې تیره اونۍ د یو شمیر وکیلانو په حواله ویل شوي وو چې د ولسي جرګې له ۶۰ څخه تر ۷۰ فیصده غړي په کورونا ویروس اخته شوي دي، چې دا به د باور رایه وځنډوي.
د ولسي جرګې د دارالانشاء مشر قادر ځاځي وویل چې د ولسي جرګې د شاوخوا سلو غړو کوویډ – ۱۹ ناروغي درلوده.
خو د ولسي جرګې بل غړي عبدالله قرلق په جرګه کې د کورونا ویروس په ناروغۍ د اخته غړو شمیر ۲۰ تنه یاد کړ.
د ولسي جرګې بلې غړې، شینکۍ کړوخېل وویل، دا څرګنده نه ده چې څومره وکیلانو د کورونا ویروس تیر کړی، خو ځینې وکیلان د ویروس د اخته کیدو له ویرې په عامه غونډو کې برخه نه اخلي.
د ولسي جرګې غړې، نیلوفر جلالي کوفي چې د کورونا ویروس په ناروغۍ اخته شوې، وویل چې یو شمیر وکیلان په ویروس اخته شوي دي او همدا لامل دی چې د جرګې نصاب تل پوره نه وي او ناستې په خپل وخت نه ترسره کیږي.
خو د ولسي جرګې لومړي مرستیال، میرزا محمد کټوازي دغه راپورونه رد کړل او ویې ویل: “د ولسي جرګې له لسو څخه تر پنځلسو پورې غړي په کورونا ویروس اخته شوي دي، مګر ډیری یې روغ دي او غونډې معمولا د دوشنبې او چهارشنبې په ورځو د غونډې په تالار کې جوړیږي او په نورو ورځو کې کمیسیونونه په قواعدو کار کوي.
د افغانستان د اساسي قانون له مخې، د ولسي جرګې د دوبي رخصتۍ د اګست په لومړۍ نیټه پیل او تر ۴۵ورځو پورې دوام کوي.
تمه کیږي چې په نوې کابینه کې د باور رایه به د اجندا په سر کې وي.
د سولې د پخلاینې عالي شورا رییس عبدالله عبدالله ته نږدې یوې سرچینې په دې وروستیو کې وویل چې دې ټیم د وزیرانو لپاره د کاندیدانو لیست ولسمشرۍ ماڼۍ ته سپارلی دی خو وروسته یې دا خبر رد کړه.
د افغانستان ولسمشرۍ ماڼۍ هم وویل چې دوی به ډیر ژر د کابینې بشپړ لیست ولسي جرګې ته واستوي.