تاند (پنجشنبه، د لړم/ عقرب ۲۱ مه) د پاکستان د ګلګت بلتستان سیمې د غذر ولسوالۍ په یاسین درې کې سین ته د یوه مسافر وړونکي موټر د لوېدو په پېښه کې د ښځو په ګډون ۱۰ کسان مړه شوي او درې نور ټپیان دي.
د لومړنیو معلوماتو له مخې، موټر له ګلګت څخه د یاسین درې د بندور سیمې ته روان و، چې د یاسین په مارک سیمه کې د جلوونکي له کنټروله وتلی او یاسین سیند ته لوېدلی دی.
په موټر کې د موټرچلوونکي په ګډون ۱۵ کسان سپاره وو. د ورکړل شویو معلوماتو له مخې، د پېښې درې ټپیان د درملنې لپاره سمدستي د یاسین اغاخان روغتون ته لېږدول شوي، په داسې حال کې چې د ښځو په ګډون د ۱۰ مړو شویو کسانو جسدونه د طاوُس ملکي روغتون ته انتقال شوي دي.
د معلوماتو له مخې، د موټر دوه نور سپرلي له پېښې روغ وتلي دي.
له دې جلا د خیبر پښتونخوا ایالت په کوهاټ ولسوالۍ کې د پولیسو پر کاروان د وسلهوالو په برید کې ۱۰ پولیس وژل شوي او ۱۲ نور ټپیان دي. د نښتو په ترڅ کې ۱۸ وسلهوال هم وژل شوي دي.
د فرانسې خبري اژانس د یوه سیمهییز جګپوړي اداري چارواکي له قوله راپور ورکړی چې بریدګرو د پولیسو دوه موټر سوځولي او د پولیسو دوه نور موټرونه یې له یوه شخصي موټر سره تښتولي دي.
د پاکستان پولیسو ویلي چې د پاکستاني طالبانو تحریک د ګمبت په سیمه کې د پولیسو پر کاروان په ګډون د څو بریدونو مسوولیت منلی دی. پولیسو همداراز ویلي چې په یوه جلا پېښه کې د اورکزو په سیمه کې د دې ډلې ۱۰ غړي وژل شوي دي.