تاند ( دوشنبه، د سرطان ۱۶) د ننګرهار دکلیو بیارغونې او پراختیا ریاست مسولان وایي په دې ولایت کې د میرمنو د کلیوالي اقتصاد د پیاوړتیا پروګرام له لوري نږدې ۲۵۰۰ تنه د غالۍ اوبدلو په صنعت بوخت دي.
د یاد ریاست رئیس امان الله میاخېل وایي دوی یواځې د بهسودو ولسوالۍ د تعمیراتو په سیمه کې ۱۳۸ تنو ته د غالیو اوبدلو په برخه کې د کارموندلو زمینه برابره کړې، چې ۱۰۰ یې مېرمنې او ۳۸ یې نارینه دي.
میاخېل زیاته کړه، چې د دوی په لاس اوبدل شوې غالۍ په بازار کې ډیر مینه وال لري او همدا لامل دی، چې د اروپا او امریکا په بازارونو کې هم پلورل کیږي.
د نوموړي په وینا دوی په هره میاشت کی نږدې ۱۵۰ متره غالۍ اوبي او بازار ته یی وړاندې کوي.
خو بل لورته بیا غالۍ اوبدونکي د خامو موادو له نشتون نه شکایت کوي او وايي که ورته د خامو موادو اسانتیا برابره شي تولید به یې ډیر او غالۍ به یې په نړیوالو بازارونو کې لومړی مقام ترلاسه کړي.
په هېواد د ننه بیا له کورني تولید څخه ډیر بهرنی تولید مینه وال لري او تولیدوونکي بیا له عامو خلکو هم غواړي، چې تر بل تولیده خپل کورني تولید ته لومړیتوب ورکړي.