تاند، سه شنبه، د جوزا ۲۰مه: د حزب وحدت مشر محمد محقق په کورونا ویروس اخته شوی دی.
د دغه ګوند د رهبرۍ غړی غلام قادر سکندري تاند ته تاییدوي چې د محقق د کورونا ازموینه اته ورځې وړاندې مثبته راغلې وه، خو په وینا یې ښاغلي محقق د کورونا شدید علایم تېر کړي دي او اوس ښه دی.
بلخوا محمد محقق هم پر فیسبوک څو انځورونه اچولي او ویلي یې دي کورونا ته ماتې ورکول هم د لښکرونو د جګړې په څېر ښې روحیې او مورال ته اړتیا لري.
تر دې وړاندې د محقق زوی محمد علي محقق چې په ولسي جرګه کې د بلخ د خلکو استازی دی، هم کورونا نیولی و او د کورنۍ ګڼ غړي یې هم په دې ناروغۍ اخته شوي دي.
دا په داسې حال کې ده چې کورونا تر اوسه په افغانستان کې د لوړ پوړو له جملې څخه د ننګرهار والي، د کندهار والي، د کابل ښاروال او مرستیالان یې، د امرالله صالح د کورنۍ غړي، د ولسمشر د دفتر ګڼ غړي، د کندوز د والي مرستیال، د عامې روغتیا پخوانی وزیر فېروز نیولي دي خو د کندوز امنیه قومندان، د کورنیو چارو وزارت یو پخوانی جنرال او ګڼ شمېر چارواکي ترې مړه شوي هم دي.