تاند، سه شنبه، د جوزا ۲۰مه: افغان حکومت پر قرنطین ځپلیو بې وزله کورنیو د وچې ډوډۍ د وېش لړۍ ودروله خو اعلان یې کړی چې د مرستو نور پروګرامونه به ژر پیل کړي.
ولسمشر غني د دغې لړۍ د پای اعلان تېره ورځ د کابینې په غونډه کې رسما کړی دی خو امر یې کړی چې اوس د وچې ډوډۍ د وېش له درولو وروسته په دویم پړاو کې له اړمنو سره مرستې پيل شي.
د سیمه ییزو ارګانونو د خپلواکې ادارې ویاند سید شاه سقیم تاند ته د دغه پروګرام په اړه وايي، د اختر تر دریمې ورځې پورې په ۳۳ ولایتونو کې له کابل پرته په ۶ میلیونه او ۶۳۵ زره ۳۷۴ کورنیو وچه ډوډۍ ویشل شوې ده.
نومړی وايي، په کابل کې هم په ۱ نیم میلیون کورنیو ۳۴ ورځې پرلپسې ډوډۍ ویشل شوې: (( هره ورځ مو ۶۴ میلیونه ۶۴۳ زره او ۸۸۴ ډوډۍ پر خلکو ویشلې دي، موږ دغه پروګرام ته ۶ اعشاریه ۳ میلیارده افغانۍ ځانګړې کړې وې.))
د یادونې ده چې په ۳۴ ولایتونو کې د وچې ډوډۍ وېش یوه نیمه میاشت وړاندې پیل شوی و ، خو په وروستیو کې د قرنطین له ماتېدو وروسته په ګڼو ولایتونو کې دا پروګرام په ناڅاپي ډول ودرول شو.