تاند(یکشنبه، د جوزا ۱۸) د افغانستان د سولې لپاره د امریکا ځانګړي استازي زلمي خلیلزاد نن (یکشنبه) په راولپنډۍ کې، چې د پاکستان د پوځ مرکز دی، د پاکستان له لوی درستیز سره ولیدل.

خلیلزاد وروسته له دې چې په کابل کې له افغان چارواکو سره د افغانستان د سولې د راتلونکي پړاو په اړه خبرې وکړې، پاکستان ته لاړ.

د پاکستاني رسنیو د راپور له مخې، خلیلزاد او جنرال قمر جاوید باجوه د دوو خواوو د دلچسپۍ پر موضوعاتو، د افغان کډوالو، د افغانستان د پخلاینې د پروسې، د افغانستان او پاکستان د پولو د مدیریت او په مجموع کې د سیمې د امنیت په اړه خبرې وکړې.

د پاکستان ټوډې ورځپاڼې د راپور له مخې، جنرال باجوه او خلیلزاد د افغانستان د سولې په لور د پورته شویو ګامونو په اړه هم د نظر تبادله وکړه.

بین الافغاني خبرې به په دوحه کې کېږي

راپورونه وايي چې خلیلزاد په کابل کې له افغان چارواکو سره د سولې د خبرو د پیلېدو د نېټې او ځای په اړه خبرې وکړې او موافقې ته ورسېد.

ګومان کېږي چې خلیلزاد کابل ته تر رسېدو وړاندې قطر ته هم تللی او له طالبانو سره یې خبرې کړي دي.

تراوسه پورې په دې اړه نه امریکا او نه طالبانو څه ویلي دي.

د امریکا د بهرنیو چارو وزارت د جمعې په ورځ (جون ۵) اعلان وکړ چې خلیلزاد د افغانستان د سولې د راتلونکي پړاو د خبرو لپاره د قطر، اسلام اباد او کابل په لور روان شو.

دغه وزارت همداراز په یوه خبرپاڼه کې لیکلي، خلیلزاد به د امریکا او افغانستان د ګډې اعلامیې او د طالبانو او امریکا د موافقې د ټولو ژمنو په ځانګړي ډول د تشدد د کمېدا او د بندیانو د خلاصون د عملي کېدو په اړه له ټولو خواوو سره د نظرتبادله وکړي.

خلیلزادپر اورکم او د بندیانو پر تبادلې د خبرو لپاره سیمې ته سفر پیل کړ