تاند (شنبه، د جوزا۱۷) د افغانستان لپاره د امریکا ځانګړی استازی زلمی خلیلزاد د دوحې، اسلام اباد او کابل په سفر راوتلی دی.
د امریکا د بهرنیو چارو وزارت تېره شپه پر خپله ویبپاڼه ولیکل، سفیر خلیلزاد نن (جمعه/ د جون ۵) د درو هیوادونو په لور روان شو.
د امریکا د باندنیو چارو وزارت وايي، ښاغلی خلیلزاد به د دې سفر په لړ کې هڅه وکړي چې د بین الافغاني خبرو د ژر پیلېدو لپاره د افغان خواوو موافقه ترلاسه کړي.
په خبرپاڼه کې دا هم ویل شوي چې خلیلزاد به د امریکا او افغانستان د ګډې اعلامیې او د طالبانو او امریکا د موافقې د ټولو ژمنو په ځانګړي ډول د تشدد د کمېدا او د بندیانو د خلاصون د عملي کېدو په اړه له ټولو خواوو سره د نظرتبادله وکړي.
د طالبانو له لوري د اختر په درو ورځو کې د اوربند له اعلانېدو وروسته ولسمشر غني د ۲ زره طالب بندیانو د خلاصون اعلان وکړ خو د طالبانو او امریکا د موافقې پر اساس طالبان د خپلو ۵ زرو بندیانو د خلاصون غوښتنه کوي.
د افغانستان حکومت وايي چې نژدې ۳ زره طالب بندیان یې خوشي کړي او نور هم خوشي کوي مګر طالبان هم باید تشدد کم کړي.
د حکومتي چارواکو د څرګندونو او راپورونو پر اساس طالبانو له اختره وروسته بیا تشدد ته زور ورکړی دی.
د چارو ځینې کتونکي باور لري چې د طالبانو له لوري د تشدد زیاتېدا د هغو کسانو له دریځ سره مرسته کوي چې د امریکا او طالبانو د موافقې او له افغانستانه د امریکايي پوځیانو د وتلو مخالف دي.