تاند(یکشنبه، د جوزا ۱۸) دولتي سرچینې وايي چې د افغانستان لپاره د امریکا ځانګړي استازي له افغان چارواکو سره د بین الافغاني خبرو د ځای او نېټې په اړه خبرې کړي دي.
د سرچینو پر اساس، ټاکل شوې چې بین الافغاني خبرې د قطر په مرکز دوحه کې وشي.
یوه دولتي چارواکي د نوم د نه ښودلو په شرط تاند ته وویل چې د خبرواترو د خای او نېټې پر سر د طالبانو له موافقې وروسته د افغانستان حکومت موافقه کړې چې د طالبانو شاوخوا ۲ زره نور بندیان هم خوشی کړي خو افغان چارواکي لا هم ټینګار کوي چې طالبان باید تشدد کم کړي.
په همدې حال کې هندي رسنیو د افغانستان د ولسمشر د ویندوی صدیق صدیقي په قول ویلي چې د افغانستان حکومت د سولې د پروسې به برخه کې مهم ګام اخیستی دی.
صدیقي دا هم ویلي چې د حکومت مرکچي پلاوی چمتو دی چې د سولې په خبرو کې ګډون وکړي. د صدیقی په وینا دا پلاوی د افغانانو د بېلابېلو خواوو او ډلو له کلک ملاتړه برخمن دی.
د افغانستان حکومت تراوسه پورې د طالبانو څه باندې ۲۷۰۰ بندیان خوشي کړي او طالبانو د حکومت ۴۵۸ تنه پرې ایښي دي.
دولتي سرچینو له تاند سره په خبرو کې د بین الافغاني مذاکراتو نېټه ونه ښوده.
د طالبانو او حکومت ترمنځ د خبرو ژر تر ژره پیلېدا له دوو اړخونو زیات اهمیت لري. له یوې خوا وېره ده چې د امریکا په حکومت کې د قطر د موافقې مخالفان د سولې په برخه شوی پرمختګ له خطر سره مخامخ کړي او له بلې خوا باور کېږي چې که د سولې خبرې د بهرنیو پوځیانو د حضور په مهال نتیجه ورنه کړي، افغانستان به په یوې بلې خونړۍ او ورانوونکې کورنۍ جګړې کې ښکېل شي.