تاند، شنبه د جوزا ۱۷مه: د ملګرو ملتونو سرمنشي انتونیو ګوتریش په افغانستان کې د سولې د ټینګښت هڅو ته خوشبیني څرګنده کړې ده.
ګوتریش د ملګرو ملتونو د مشورتي بورډ په غونډه کې چې پرون جمعه د انلاین تماس له لارې جوړه شوه ویلي دي چې ملګري ملتونه په افغانستان کې د سولې له روانو هڅو سره مرسته کوي.
بلخوا د دې بورډ غړې سیما سمر په افغانستان کې د سولې په روانو هڅو کې د ملګرو ملتونو د ونډې د زیاتېدو غوښتنه وکړه.
سیما سمر چې د منځګړیتوب په چارو کې د ملګرو ملتونو د سرمنشي د مشورتي بورډ غړې ده وايي چې پرون د غبرګولي ۱۶مه نېټه د دې بورډ په غونډه کې د افغانستان په اړه هم بحث وشو او په دې انلاین غونډه کې یې له سرمنشي انتونیو ګوترش څخه په افغانستان کې د سولې په روانو هڅو کې د ملګرو ملتونو د ونډې د پراخېدو غوښتنه وکړه.
نوموړې وايي ښاغلي ګوتریش ډاډ ورکړ چې د افغانستان د سولې په هڅو کې به همکاري وکړي: “له سرمنشي څخه مې هیله وکړه چې ملګري ملتونه دې د افغانستان د سولې په مسئله کې نور فعال عمل وکړي، له طالبانو سره د خبرو په جریان کې باید د ښځو پر حقونو او پر بشري حقونو معامله ونهشي. د ملګرو ملتونو سرمنشي وویل چې په افغانستان کې د سولې د ټینګښت په برخه کې خوشبین دی، په تېره اوس چې د افغان حکومت او طالبانو ترمنځ د بندیانو د تبادلې بهیر چټک شوی دا سازمان چمتو دی چې په دې برخه کې مرسته وکړي.”
نوموړې وايي چې ملګري ملتونه کولای شي د افغانستان د سولې په بهیر کې اساسي رول ولوبوي: “زه فکر کوم ملګري ملتونه لاهم د افغانستان په خلکو کې یو اعتبار لري. یعنې دا سازمان چې په افغانستان کې د بشري حقونو وارث بلل کېږي کولای شي ډېر اساسي او مهم رول ولوبوي.”
دا په داسې حال کې ده چې ملګرو ملتونو د اپرېل په ۳۰مه نېټه ویلي و چې د افغان حکومت او طالبانو ترمنځ د اوربند د ټینګښت لپاره یې هڅې پیل کړې دي او له هغه هم مخکې د مارچ په ۲۳مه نېټهیې د افغانستان په ګډون په ټولو جګړهځپلو هېوادونو کې د اوربند غوښتنه کړې وه.
بیا وروسته د دغه نړیوال سازمان سرمنشي انتونیو ګوتریش په اپرېل میاشت کې وویل چې د نړۍ ۱۶ غیر حکومتي وسلهوالو ډلو د اوربند لپاره د ده غوښتنه منلې ده، خو د طالبانو نوم په دې لېست کې نهو.