پوهاند نصرالله ستانکزی
په دې تېرو ورځو کې د پاکستان د پوځ ویاند، احمد شریف چوهدري، طالبانو ته ویلي چې له کفارو سره په اړیکو کې دې احتیاط کوي او ځان دې له هغو لرې ساتي.
د دې ویاند څرګندونې د هند او طالبانو د پټو او ښکاره اړیکو په هکله دي. زما بحث د طالبانو او هندیانو د اړیکو د مثبتو او منفي اغېزو او څرنګوالي په هکله نه دی، بلکې خبره په دې کې ده چې که په نننۍ نړۍ کې له کفارو سره دوستي او سیاسي اړیکې نامشروع وي، نو ښکاره بېلګه یې په خپله د ښاغلي ویاند هېواد دی، چې له اصله یې موجودیت د انګرېز د سیاستونو پایله ده.
که د پاکستان د اتو لسیزو موجودیت ته پام وکړو، د دې هېواد بقا د غیر اسلامي هېوادونو لکه چین، امریکا، بریتانیا او نورو لوېدیځو هېوادونو له برکته ده. پاکستاني سیاستوال دغو اړیکو ته نه یوازې په ستراتیژیک انداز ګوري، بلکې هغو ته د تقدس بڼه ورکوي. دوی وار وار په سیمه کې د لوېدیځې نړۍ د ژاندارم په توګه رول لوبولی دی او لا تر اوسه هم دغه ستراتیژي په اسلاماباد کې حاکمه ده.
د بېلګې په توګه، د امریکا په اشاره د ایران او امریکا په جګړه کې د پاکستان د واسط ــ نه د منځګړي په توګه، ځکه پاکستان د منځګړیتوب حقوقي او سیاسي ظرفیت نه لري ــ رول، یا دا چې د پاکستان د صدراعظم شهباز شریف هغه څرګندونې چې ډونالډ ټرمپ یې د نوبل د جایزې مستحق وګاڼه. همدارنګه ټرمپ د ۲۰۲۵ کال د اکتوبر په میاشت کې د پاکستان د پوځي مشر، عاصم منیر، په هکله په یوه ناسته کې وویل: «زما محبوب فیلډ مارشال.»
ما مخکې ولیکل چې پاکستان له لوېدیځ، په تېره له امریکا، سره خپلې اړیکې د تقدس تر حده انځوروي. د دغه ادعا د اثبات لپاره د سپینې ماڼۍ د ۱۹۷۳ کال د سپټمبر د ۱۸مې نېټې یوه یادښت ته مو پام راګرځوم.
دا یادښت د ذوالفقار علي بوټو د پاکستان د هغه سفر په هکله دی چې د ۱۹۷۳ کال په سپټمبر کې ترسره شوی و. په دغه سفر کې چې له ښاغلي بوټو سره د پاکستان د هغه وخت د بهرنیو چارو وزیر سردار عزیز او په امریکا کې د پاکستان سفیر شیرین خان هم ملګري وو، له امریکایي لوړپوړو مقاماتو سره د غونډې د بهیر په هکله لیکل شوي دي.
د مجلس په پیل کې د امریکا جمهور رئیس، نیکسن، په داسې حال کې چې د جمهور رئیس مرستیال او د بهرنیو چارو وزیر کیسنجر هم حضور درلود، پاکستاني پلاوي ته وویل: «لطفاً د موضوعاتو په هکله واضح خبرې وکړئ.»
په ځواب کې بوټو په خوښۍ وویل: «مننه ستاسو له څرګندونو. دا یو استثنايي موقعیت دی. مهرباني مو وکړه چې موږ ته مو د واضح خبرو کولو موقع راکړه؛ ځکه ډېر ځله موږ ته د بربنډو خبرو اجازه نه ده راکړل شوې. موږ پاکستانیان ستاسو تر څنګ په صداقت او تواضع سره په نړیوال امنیت کې خپل رول په ښه توګه ترسره کړی، د منځني ختیځ مسئله د جنوبي اسیا له موضوعاتو سره نېغ په نېغه تړاو لري او پاکستان نه شي کولای په دې هکله بېتفاوته پاتې شي …»
دا یادښت د یوه ساعت او پنځه څلوېښت دقیقو د غونډې په هکله دی. د یاد یادښت په یوه بله برخه کې د بوټو له خولې داسې نقل شوي دي:
«پاکستان د خلیج په خوله کې پروت دی. هر هېواد چې د کراچۍ ساحلونه یې په لاس کې وي، خلیج به په خپل تصرف کې ولري. همدا لامل دی چې شوروي اتحاد ډېره لېوالتیا لري چې ځان دې سیمې ته ورسوي. پاکستان له لوېدیځ کلتور سره په نړیوالو مناسباتو کې ورګډ شوی دی. موږ له امریکا سره تعهد کړی. په تېر کې معامله اسانه وه؛ د خدای او شیطان تر منځ به مو یو غوره کاوه او موږ خدای غوره کړی دی.»
د دې خبرو په کتو، د پاکستاني چارواکو معبود له پخوا ټاکل شوی؛ او هغه واشنګټن دی.
نو د پورتنۍ بېلګې په کتو، پاکستان ته له کفر سره دوستي مقدسه او نورو ته حرامه ده.
استاد ستانکزی صیب ،
لیکنه مو ډيره روښانه ده خو زموږ ځینې افغانان یې هغه وخت غلط کړل چې کله دوی ولیکل چې جهاد افغانستان دفاع پاکستان
شوروی غوښتل چې ګرمو اوبو ته ځان ورسوی خو شورویانو په زور دا کار وکړ که له نرمي یې کار اخیستلی وای ستونزه حل کیدله .
لکه اوس تازه د روسیی یو چارواکی د روسیې د لومړي وزیر مرستیال، مارات خوسنولین، وايي چې مسکو باید د هند سمندر ته د یوې رېلپټلۍ د جوړولو امکان وڅېړي؛ داسې لاره چې د هرمز او بسفر تنګیو بدیل کېدای شي.هغه وايي، یوه له احتمالي لارو څخه دا ده چې د ترکمنستان، ایران، افغانستان او پاکستان له لارې تر هند سمندر پورې د رېلپټلۍ جوړه شي.
https://taand.net/?p=273833
زما په نظر اوس روسیه د شوروی د وخت اهداف تر لاسه کولی شي نن پاکستان، افغانستان ، ایران هند ورسره همکاری ته لیوالتیا لری
پرون ایران، سعودی، پاکستان زموږ د وژلو لپاره په پاکستان کې ۷ یا ۸ ډلی جوړی کړی بیا کابل په کنډواله بدل کړ
سلام
استاد یو عالم انسان دی هرڅه په ژوره مانا او مفهوم څېړی په اټکل یو ې موضوع ته نه ګوری !
له بده مرغه کله چې ای اس ای دربانی په زور دکابل شاهانو ، رتبیل شاهانو ۲۵۰ کلن کلی [ کابل] په کنډواله بدل کړ اومولا عمر دای اس ای په استخباراتی لوبو د امارت ظرفیت ته مصنوعی ډوله چمتو کیږی افغانان ولې غلی تیریږی داهم خیرات دی څنګه ؟
د پوهاند صاحب د پورته لیکنی هره کرښه پر واقعیت ولاړه ده.
د پرون او نن او سبا د حکومتداری او سیاست بازی په بازار کی د دین او مذهب تداخل ته یو ځغلند نظر:
دا یوازی پاکستان نه دی چی یوی حجابی فاحشی غوندی ئی خپلی ډول ډول معاملی مخته وړی دی بلکه ګرانو لوستونکو ته د مذهبی افکارو او مذهبی ادبیاتو تر پوست او چتر لاندی د سیمی او نړی په نژدی تاریخ کی د حاکمانو د مذهبی احساساتو د بروز او بیان جالبی او حیرانوونکی او په عین حال کی خواګرځنی منظری ته د ننداری بلنه ورکوم:
۱ – د خلیج د لومړی جګړی ( د جورج ډبلیو بوټ حمله د صدام پر ضد) په درشل کی د حملی یوه دوی ورځی بوش د واشنګټن ډی سی مرکزی کلیسا ته تشریف یووړ او په رسمی توګه ئی پر صدام باندی د بریالیتوب د دُعا مراسم پر ځای کړه.
له بلی خوا صدام چی هیڅکله هیچا د لمونځ او دُعا په حالت کی نه ؤ لیدلی د بوش د حملی
دوی ورځی مخکی ئی په هره کوڅه او هر ډګر کی د خبرنګارانو په حضور کی جای نماز هوار او بُک بُک به کیدی.
ما چی کله په تلویزیونو کی دا دواړی صحنی ولیدی( هم د بوش حضور په کلیسا کی او هم د صدام ډیپلوماټیک لمونځ) نو می انډیوالانو ته وویل چی سیاست ممکن مور او پلار ولری خو اولاد او میرمن نلری یعنی رحم او اخلاق نه پیژنی.
۲ – پر افغانستان باندی د شوروی د یرغل په لسیزه کی په هند کی د کانګریس ګوند حاکم ۇ کوم چی مشره ئی فقیده ایندرا ګاندی وه ( زه د شوروی د یرغل سخت مخالف وم خو د شوروی د ښکاره یرغل په وړاندی د هند د دولت محطانه دریځ او موقف راته د درک او توجیه وړ ؤ او هیڅکله می نه دی غندلی) .
هغه وخت د هند په پارلمان کی د بهارت یاجاناتا افراطی هندوئیزم ته وفادار ګوند فقط یو نماینده درلود( نوم ئی را نه هیر شوی دی) دې هندو لالا همیشه پر افغانستان باندی د شوروی یرغل غانده او هغه ئی د الحاد حمله پر مذهب او مسلمانانو ګڼله او حتی د افغان مجاهدینو د مقاومت په ستاینه کی ئی اَنګارین شعرونه لیکل او لوستل . د همدی هندو لالا ګوند کلونه وروسته د هند د پارلمان اکثریت کرسیانی وګټلی او د کانګرس ګوند ته ئی سخته ماته ورکړه او د حکومت چاری ئی په لاس کی واخیستی، جالبه دا ده چی د قدرت تر لاسه کولو مخکی هم وتوانیده چی د خپل ګوند عام خواخوږی تهییج او تحریک کړی څو په ډهلی کی د بابری تاریخی مسجد ویران او پر ځای ئی خپل تاریخی معبد جوړ کړی. دا لا څه کله چی اوسنی صدراعظم د ګجرات د ایالت ګورنر ۇ د بهارت یاجاناتا د ګوند خواخوږو په سلګونو او زرګونو مسلمانان ووژل.
۳ – د روان کال د فبروری په میاشت کی ټرامپ پر ایران باندی د حملی مخکی سپینی ماڼی ته د نیواِنجسلی تفکر تکړه تکړه اخوندزادګان را بللی او پر ایران باندی ئی د بریالیتوب په هیله د دسته جمعی دُعاګانو ( کومی چی یو هنری تئاتر او ډرام ته ورته وی) مراسم اجراء کړه.
نو
ګرانه لوستونکی! په اصطلاح ږغ به نلری د پردی شا ته نوری حیرانوونکی او ځوروونکی او ویرانوونکی لوبی جریان لری.