تاند (جمعه، د زمريږ اسد ۳ مه) د زابل د اطلاعاتو او کلتور ریاست وايي چې د هیواد د یوه نامتو څېړونکي او لیکوال محمدمعصوم هوتګ په مالي ملاتړ په دې ولایت کې د پټې خزانې د مولف محمد هوتک د مقبرې د جوړولو چارې پیل شوي دي.
د زابل د اطلاعاتو او فرهنګ ریاست ویلي چې دا پروژه د همدې ریاست په هڅو او د افغان لیکوال او څېړونکي محمد معصوم هوتک په مالي ملاتړ پیل شوې، او ټاکل شوې ده چې په یوه میاشت کې بشپړه شي.
د زابل د اطلاعاتو او فرهنګ ریاست د ګرځندوی او اطلاعاتو آمر عبدالولي بشرمل ویلي چې په دې پروژه کې د محمد هوتک د مقبرې شاوخوا د احاطوي دېوال جوړول او د یوه جومات ودانول هم شامل دي.
هغه زیاته کړې چې د طالبانو د اطلاعاتو او فرهنګ وزارت هم ژمنه کړې چې دا مقبره به په اساسي ډول ورغوي.
د زابل اوسېدونکو د دې پروسې هرکلی کړی او ویلي یې دي چې چارواکو باید ډېر پخوا د دې ادبي شخصیت مقبره جوړه کړې وای.
محمد هوتک د پښتو ژبې نامتو لیکوال، شاعر، تاریخلیکونکی او د «پټې خزانې» مؤلف و. هغه د داودخان هوتک زوی او د قادرخان هوتک لمسی و، او د هوتکي دولت په دوره کې یې ژوند کاوه. نوموړی په ۱۰۸۴ هـ.ق. کې د کندهار د کوکران په کلي کې زېږېدلی و.
محمد هوتک د خپل وخت یو لوستی او ادیب شخصیت و. د دیني علومو، فقهې او ادبیاتو له زدهکړې وروسته د شاهحسین هوتک دربار ته ولاړ او د منشي (درباري لیکوال) په توګه یې دنده ترسره کړه. د دربار له باوري او علمپالو کسانو څخه ګڼل کېده.
د هغه تر ټولو مشهور اثر «پټه خزانه» ده، چې په ۱۱۴۱–۱۱۴۲ هـ.ق. کې یې د شاه حسین هوتک په امر ولیکله. دا کتاب د پښتو شاعرانو او ادیبانو یوه تذکره ده، چې د لرغونو او منځنیو پښتنو شاعرانو ژوندلیکونه او د هغوی د شعرونو بېلګې پکې راټولې شوې دي. دغه اثر د پښتو ادبیاتو له مهمو تاریخي سرچینو څخه ګڼل کېږي.
د روایتونو له مخې، محمد هوتک د نادر افشار له خوا د کندهار تر نیول کېدو وروسته د زابل د سیوري ولسوالۍ د ممو کلي ته ولاړ، هلته یې پاتې ژوند تېر کړ او هماغلته خاورو ته وسپارل شو. د هغه قبر اوس هم په همدې سیمه کې موقعیت لري.