تاند (پنجشنبه، د غويي/ ثور ۲۴ مه) د روسیې د رېللارو مرستیال سرګی پافولوف ویلي چې روسي او ازبکستاني کارپوهان د «افغان ټرانس» رېللارې پروژې د امکانسنجۍ پر بېلابېلو برخو کار کوي.
د تاس خبري اژانس د راپور له مخې، دا پروژه د رېللارې په وسیله د منځنۍ اسیا او جنوبي اسیا د نښلولو لپاره طرحه شوې او د دواړو هېوادونو تخنیکي همکارۍ پکې دوام لري.
پاولوف دغه څرګندونې د پنجشنبې په ورځ د ګډو ګټو د خپلواکو هېوادونو د رېلارې د ترانسپورټ شورا په غونډه کې، چې په عشق اباد کې ترسره شوه، کړې دي.
د راپور له مخې، په ۲۰۲۱ کال د فبرورۍ په میاشت کې ازبکستان، افغانستان او پاکستان په تاشکند کې د «ترمذ–مزارشریف–کابل–پېښور» د رېللارې د جوړولو طرحه لاسلیک کړې وه.
ټاکل شوې وه چې د پروژې عملي پړاو هماغه کال پیل شي، خو په افغانستان کې سیاسي بدلونونو دا بهیر وځنډاوه.
وروسته په ۲۰۲۲ کال کې، د افغانستان دننه د مسیر ټاکلو او لومړنیو تخنیکي ارزونو چارې بېرته پیل شوې، خو د پروژې پرمختګ لا هم محدود بلل شوی دی.
دا غونډه په داسې حال کې شوې چې د چارواکو په وینا، د ګډو ګټو د خپلواکو هېوادونو ترمنځ د ترانسپورتي همکاریو موضوع لا هم د بحثونو مهمه برخه ده.
د ټرانس افغان رېللار پروژه ۶۴۷ کیلومتره اوږدوالی لري او اټکلي لګښت یې ۴.۶ میلیارد ډالره ښودل شوی دی.
دا پروژه وروسته له هغې د امکانسنجۍ مرحلې ته داخله شوه چې د جولای په ۱۷مه، ازبکستان، افغانستان او پاکستان په کابل کې د ګډو مطالعاتو د پیل هوکړه لاسلیک کړه.
د ازبکستان د ترانسپورټ وزارت مرستیال یاسربېک چورییف ویلي، دا رېللار به د ازبکستان له جنوبي ښار ترمذ څخه پیل شي، د افغانستان له نایبآباد، میدانښار او لوګر څخه به تېره شي او په پای کې به له خوست ولایت څخه د خیبرپښتونخوا د خرلاڅۍ بندر ته ورسېږي.