تاند (یکشنبه، د غويي/ ثور ۲۰ مه) په لښکرګاه ښار کې پر هلمند سیند د یوه نوي پُل د جوړولو چارې پیل شوې دي.
د باختر دولتي خبري اژانس د راپور له مخې، د دې پُل ټول لګښت ۳.۲ میلیون ډالره اټکل شوی دی.
راپور وايي، دا پُل به، چې د اطلاعاتو او کلتور وزارت له خوا جوړېږي، ۳۴۰ متره اوږدوالی او ۹ متره پلنوالی ولري، او ټاکل شوې ده چې د ۱۸ میاشتو په موده کې بشپړ شي.
د چارواکو په وینا، له بشپړېدو وروسته به دا پُل لښکرګاه ښار د باباجي ولسوالۍ له لارې د کندهار ـ هرات له لویې لارې سره ونښلوي، چې د ترانسپورټ اسانتیا او سوداګرۍ ته به وده ورکړي.