خبریال: داوود جبارخېل: د پېښور په دیر کالونۍ سیمه کې د «الخیر سکول سیسټم» د ښوونځي د چت د نړېدو له امله د ۲۹ ماشومانو په شمول ۳۰ تنه مړه شوي او شاوخوا ۴۰ زدهکوونکي او ښوونکي ټپیان شوي دي.
پېښه د سهار په ۸ بجې او ۴۸ دقیقې وشوه.
د لېډي ریډینګ روغتون د ویاند محمد عاصم په وینا، د پېښې له رامنځته کېدو وروسته لسکونه زدهکوونکي او ښوونکي روغتون ته انتقال شوي دي، چې له ډلې یې ځینو کسانو د درملنې پر مهال ساه ورکړې ده.
د روغتون چارواکي وايي، د نورو ټپیانو درملنه روانه ده او ځینو ټپیانو ته لومړنۍ طبي مرستې ورکړل شوې دي.
له بلې خوا، د ریسکیو ادارې ډلې د ښوونځي د نړېدلې برخې په خاورو او خځلو کې د نورو کسانو د بند پاتې کېدو د احتمال له امله د لټون او ژغورنې عملیاتو ته دوام ورکوي.
د چارواکو په وینا، لا هم امکان شته چې د ودانۍ تر خاورو لاندې نور زدهکوونکي یا کارکوونکي بند پاتې وي؛ له همدې امله د مرګژوبلې د زیاتېدو اندېښنه هم شته.
د پېښې له امله په سیمه کې ګڼ خلک راټول شوي او د ژغورنې ډلې د درنو وسایلو په مرسته د ودانۍ د کنډوالو په لرې کولو بوختې دي.
تر اوسه د چت د نړېدو اصلي لامل په رسمي ډول نه دی څرګند شوی. چارواکي وايي، د پېښې له بشپړې ارزونې وروسته به د ودانۍ د نړېدو د علت په اړه نور معلومات وړاندې شي.