تاند (سه شنبه د وري – حمل ۴مه) افغانستان کې د طالبانو د ملي پراختیا شرکت وایي چې د قوشتېپې کانال د دویم فاز چارې به ژر بشپړې او ګټتنې ته وسپارل شي.
مسوولان وایي چې، دا مهال د قوشتېپې کانال د دویم فاز چارې ۹۸ سلنه بشپړې شوې.
دوی زیاتوي چې، د دغه فاز ۲۵ پلونه او د اوبو مهارولو تاسیسات جوړ شوي او نور به یې هم ژر بشپړ شي.
یاد شرکت زیاته کړې چې، په دې ۱۷۷ کیلو مټره اوږد فاز کې د سربندونو چارې ۹۰ سلنه کارونه بشپړ شوي او پاتې کارونه یې په چټکۍ روان دي.
د قوشتېپې کانال پروژه د هېواد له سترو پروژو څخه ده چې، په بشپړېدو سره به یې په بېلابېلو سیمو کې کرنه پراختیا ومومي او نوي کاري فرصتونه به رامنځته شي.
اقتصادي کارپوهان د قوشتېپې کانال پروژه د هېواد لپاره حیاتي بللې او له طالبانو غواړي چې دې پروژې ته پاملرنه لا زیاته کړي.