تاند (یکشنبه، د وروي/ حمل ۲ مه) د فایننشال ټایمز د راپور له مخې، د ایران جګړې د نړۍ د سترو هوايي شرکتونو ارزښت ته سخت زیان اړولی او تر ۵۰ میلیارد ډالرو څخه ډېر تاوان یې اړولی دی.
راپور وايي چې د امریکا او اسرائیل له خوا د ایران پر وړاندې د جګړې له پیل راهیسې، د نړۍ د ۲۰ سترو هوايي شرکتونو ارزښت په مجموع کې شاوخوا ۵۳ میلیارد ډالره کم شوی دی.
د راپور له مخې، د هوايي چلند صنعت اوس له کورونا وبا وروسته تر ټولو له سخت بحران سره مخامخ دی، ځکه جګړې د خلیج سیمې په مهمو هوايي ډګرونو کې ګډوډي رامنځته کړې او ډېرې الوتنې درېدلې دي.
همداراز، د هوايي شرکتونو مسوولانو د سونتوکو د کمښت په اړه خبرداری ورکړی، چې د جګړې د دوام له امله اندېښنې لا زیاتې شوې دي.
فایننشال ټایمز لیکي چې د جټ سونتوکو بیه، چې د هوايي شرکتونو د لګښتونو شاوخوا درېیمه برخه جوړوي، د جګړې له پیل راهیسې نژدې دوه برابره شوې ده، او دا به د الوتنو د ټکټونو د بیو د لوړېدو سبب شي.