تاند (یکشنبه، د وري/ حمل ۲ مه) په کابل کې د طالبانو حکومت وايي پاکستان يو ځل بیا پر افغانستان بریدونه پيل کړي دي.
د طالبانو د حکومت مرستيال وياند، حمدالله فطرت نن (یکشنبې) پر خپله اېکسپاڼه ليکلي چې نن سهار پاکستاني پوځيانو د کونړ ولایت پر ناړۍ ولسوالۍ د هاوان ګولۍ ویشتلي چې له امله یې يو نارينه وژل شوی او يوه ښځه ژوبله شوې ده.
تر دې وړاندې د اختر په لومړۍ ورځ هم پاکستان د کونړ پر ناړۍ او همداراز مرورې ولسوالیو د هاوان او توپونو ګوزارونه کړي وو.
د فطرت په وينا، پاکستاني پوځ د پکتیکا ولایت په شکین ولسوالۍ کې د ملکي خلکو پر موټر ډزې کړي خو چاته زیان نه دی اوښتی.
تر اوسه پاکستان په دې اړه څه نه دي ويلي.
افغانستان او پاکستان د سعودي عربستان، قطر او ترکیې په غوښتنه د اختر په مناسبت درې ورځنی اوربند اعلان کړی وو. پاکستان د فبرورۍ د مياشتې له وروستيو څخه په کابل، ننګرهار، پکتيکا، خوست او کونړ کې بمبارۍ کړې دي. په غبرګون کې یې افغان ځواکونو هم د بې پېلوټه الوتکو او مخامخ جګړې له لارې ځواب ورکړی دی.
اسلام اباد ادعا کوي چې په افغانستان کې دننه بریدونه د هغو پاکستاني وسله والو د مرکزونو ویشتلو لپاره کوي چې په پاکستان کې حملې کوي. پاکستاني چارواکي په هغو بریدونو کې د سلګونو افغان او پاکستاني طالبانو د وژلو دعوه کوي. خو د بشري حقونو نړيوالو ادارو، ملګرو ملتونو او د طالبانو حکومت وايي د پاکستان په حملو کې ولسي وګړي وژل شوي دي.
یوازې په کابل کې د معتادانو پر درملیز مرکز د پاکستان په بمبارۍ کې تر ۴۰۰ ډېر ملکي وګړي ووژل شول او تر ۲۶۰ ډېر نور ژوبل شول.