تاند (سې شنبه، د کب/ حوت ۵ مه) ازبکستان او افغانستان پلان لري چې د دواړو هېوادونو ترمنځ د سوداګرۍ کچه تر ۵ میلیارده ډالرو پورې لوړه کړي.
د منځنۍ اسیا د تریند خبري اژانس د راپور له مخې، دا خبره د ازبکستان د صدراعظم مرستیال جمشېد خودجایف پر خپلې ټولنیزې پاڼې لیکلې ده.
د معلوماتو له مخې، دا شمېرې د افغانستان د صنعت او سوداګرۍ له وزیر نورالدین عزیزي سره د ویډیویي کنفرانس پر په ترڅ کې اعلان شوې.
خودجایف ویلي دي:
«یوازې په پنځو کلونو کې زموږ د هېوادونو ترمنځ دوه اړخیزه سوداګري ۲.۵ برابره لوړه شوې ده؛ دا کچه په ۲۰۲۱ کال کې له ۶۵۳ میلیون ډالرو څخه په ۲۰۲۵ کال کې ۱.۷ میلیارده ډالرو ته رسېدلې ده. زموږ موخه دا ده چې دا رقم تر ۵ میلیارد ډالرو پورې لوړ کړو.»
هغه زیاته کړه:
«موږ د سوداګرۍ او اقتصادي همکاریو د پراختیا لپاره پر عملي ګامونو خبرې وکړې او همداراز مو ازبکستان ته د افغان پلاوي د راتلونکي سفر پر چمتووالي بحث وکړ.»
د ازبکستان د صدراعظم مرستیال وویل چې د روژې له میاشتې وروسته، اړوند لوري غواړي دا همکاري په عملي ډول مخته یوسي؛ چې پکې په کابل کې د سوداګریز فورم جوړول او د یوې داسې لارې نقشې (روډمپ) ترتیب شامل دی چې د همکاریو مهم تمرکزونه پکې مشخص شي.