تاند (چهارشنبه، د سلواغې/ دلوې ۲۹ مه) د افغانستان د طالبانو حکومت درې پاکستاني سرتېري د سعودي عربستان په منځګړیتوب او غوښتنه خوشي کړل.
د طالبانو ویاند ذبیحالله مجاهد د سې شنبې په ورځ وویل، هغه درې پاکستاني پوځیان چې تېر کال د ډیورند کرښې ًپه اوږدو کې د نښتو پر مهال نیول شوي وو، د سعودي عربستان د غوښتنې پر بنسټ خوشې شول.
نوموړي زیاته کړه چې دا اقدام د طالبانو د هغې تګلارې برخه ده چې غواړي له هېوادونو سره مثبتې اړیکې وساتي، او همداراز د روژې د مبارکې میاشتې د رارسېدو له امله شوی دی.
د چارواکو په وینا، دغه سرتېري چې په تېر اکتوبر کې د نښتو په ترڅ کې نیول شوي وو، د همدې اوونۍ په پیل کې سعودي پلاوي ته، چې کابل ته راغلی و، وسپارل شول.
ویاند وویل، دا ګام د افغانستان او پاکستان ترمنځ د تاوتریخوالي د کمولو لپاره د روانو ډیپلوماتیکو هڅو درناوی هم څرګندوي.
په وروستیو میاشتو کې د طالبانو او اسلاماباد اړیکې د پرلهپسې سرحدي نښتو، امنیتي شخړو او د پولو د تړل کېدو له امله خرابې شوې دي، چې دواړو غاړو ته یې پر سوداګرۍ او ولسي تګ راتګ ناوړه اغېز کړی دی.
پاکستاني رسنیو مخکې راپور ورکړی و چې د تورخم بندېدو دواړو لورو ته تر ۲۴۰ میلیون ډالره زیات زیانونه اړولي دي.